Det går veldig i rykk og napp med denne Bobla – ser eg har ikkje laga noko innlegg sidan eg var på padletur i sommar. Padletur har eg ikkje vore på i dag, men turen i dag fortener og eit innlegg her på Bobla 🌞
Dei som føl litt med her og der, veit at vi har fått støtte til ny vedomn på Fjelly. Omnen er kjøpt inn, og har stått på lagring i garasjen til Hans Ordin i påvente av at det skulle bli ver og føre til å få den opp og over fjellet. Det er det no 😀
Forrige helg vart omnen frakta til endes av Pålavegen med traktor – i dag passa det å få den vidare med snøscooter ned til hytta.
Vi hadde i fyrst tenkt å gå opp på Fjelly fredag kveld og overnatta – og såleis stå klar til å ta imot omnen når den kom. Men, når meldingane vise at det skulle bli minus 11 grader, slo vi det frå oss. Vi hadde jo ikkje fått opp varmen i hytta til eit leveleg nivå før på morgenkvisten 😉
Ok, vi juksa litt og køyrte opp til sving nr. 2 og gjekk til fots derifrå. Hardt og godt føre å gå på. Og sjølv om det ikkje det ikkje er daglegdags for A. Enæs å kle seg ut som Michelinmannen for å gå fjelltur i -10 grader kl 0900 om morgonen, var eg glad for at eg gjorde det i dag 😀 For det var ein magisk morgon. I retning Fjellandsbø var himmelen gul, i retning Skorpo var den rosa.
Vi stod litt her og venta for å sjå om snøscooteren kom, men vi høyrte ingenting. Og når den ikkje kom til avtala tid, visste vi at dei ikkje trong vår hjelp her – så då kunne vi fortsetja turen til Fjelly 😃
Om det var fint å gå opp Pålavegen, vart det ikkje mindre fint oppå fjellet…
Og medan nokon hasta inn i hytta, fekk på gassomnen og fekk fyr i omnen i håp om at det skulle bli iallefall ei lita lunk – fann andre seg arbeid ute …
Så var det berre å prøva å få varmen i tærne att medan vi venta i spaning på at omnen skulle koma over fjellet….
Det tok ikkje veldig lang tid….
Lengre enn dette kom ikkje omnen i dag. No må pipa få seg eit strøk maling og den gamle omnen demonterast, før den nye kan setjast skikkeleg på plass. Vi satsar på at vi skal rekka på dette i januar. Fjelly bli no stengt for utleige inntil denne jobben er gjort.
Men fekk vi opp varmen i hytta? Det var minusgrader inne når vi kom – det la seg is på vatnet vi sat fram til hunden 😱 Men så steig temperaturen til 2 grader, så til 4 – og så veit vi ikkje heilt kva som skjedde, for brått visste det 11-12 grader 😀 Då syntes vi eigentleg det var varmt nok til å kasta jakka 😀
Vi hadde ein liten plan om å tenna i bålpanna å grilla pølser medan vi var her oppe. Men, når vi endeleg hadde fått litt varme i hytta, freista det ikkje å gå ut att …
Så då vart vi mette og før vi pakka saman og tok fatt på heimturen.
No gledar vi oss berre til å få den nye omnen installert i hytta slik at vi kan invitera dåke inn i varm hytte og servera noko nysteikt å bita i 😀😀
anitasboble 